مُجھ پہ بھی چشمِ کرم اے میرے آقا کرنا ﷺ
حق تو میرا بھی ہے رحمت کا تقاضا کرنا
میں کہ ذرّہ ہُوں مُجھے وُسعتِ صحرا دےدے
کہ تیرے بس میں ہے قطرے کو بھی دریا کرنا
مَیں ہُوں بےکس تیرا شیوہ ہے سہارا دینا
میں ہُوں بیمار تیرا کام ہے اچّھا کرنا
تُو کسی کو بھی اٹھاتا نہیں اپنے در سے
کہ تیری شان کے شایاں نہیں ایسا کرنا
تیرے صدقے، وہ اُسی رنگ میں خود ہی ڈُوبا
جس نے، جس رنگ میں چاہا مُجھےرُسوا کرنا
یہ تیری شان ہے اے آمنہ کے دُرِِّ یتیم ﷺ
ساری اُمّت کی شفاعت، تنِ تنہا کرنا
آل و اصحاب کی سُنّت ، میرا معیارِ وفا
تری چاہت کے عوض ، جان کا سودا کرنا
اُن صحابہ کی خُوش اطوار نگاہوں کو سلام
جن کا مسلک تھا طوافِ رخِ زیبا کرنا
مُجھ پہ محشر میں نصیرؔ اُنکی نظر پڑ ہی گئی
کہنے والے اِسے کہتے ہیں، خُدا کا کرنا
الصلوةوالسلام علیک یارسول اللہ
وعلیٰ الک واصحابک یاحبیب اللہ